ربما تراكمت علينا الاحداث الكثيرة و المقرفة في الفترة الاخيرة مما حذا بالبعض الى تجنب التفكير تماما
بل و الادهى انه انت اصبحت في خطر اذا فكرت
الحادث ده اتقالي بالنص كنت في اجتماع و طلب مننا حل معضلة في الشبكات و الكل تمسك رأيه فقلت اذن لنفكر بطريقة اخرى ، وجدت وجوم في المنطقة وواحد مال عليا و قاللي نفكر !!!!!!
و كأني طلبت منه انه يقلع عريان (اسف )
المشكلة انه انا بفكر و اصبحت غريب في مجتمعي الذي اصبح من يفكر فيه متهما بتهمة الخيانة العظمى
مشكلة اصبحنا نعانيها في المقابلات التي نجريها للوظائف في شركتنا ، عملنا امتحان ذكاء مكون من 6 اسئلة (اكتر من كده لقينا انه الناس بتطول بشكل غير طبيعي)
احد الاسئلة : في البيت 3 تفاحات اخدت و انت نازل من البيت اتنين يبقا معاك كام ؟ بسيطة مفيش اي عقد لو انت يعني تخيلتها حيكون معاك اتنين ، لقينا انه محدش بيجاوب ناس تقول 3 و ناس تقول واحد (واحد قال معاييش ولا تفاحة)
و لانه الاغلبية جاوبت واحد روحنا قولنا نسهل السؤال و عكسناه (معاك في البيت 3 تفاحات اخدت و انت نازل اتنين يبقا في كام في البيت) مش عارف اقول ايه بس و الله كما تتوقعوا الكل جاوب 2
سؤال تاني (في ولاية كاليفورنيا هل يجوز لرجل انه يتجوز اخت ارملته) سؤال سخيف مش كده
خد بقا عندك
اه ينفع
معرفشي
اكيد
بس في اتنين جامدين جدا جدا جدا
واحد قال
انا مسافرتش كاليفورنيا و انا لا اعرف القوانين هناك
التاني الجامد اوي
في امريكا قانون يمنع الرجل من الزواج باتنين
فانا في خطر يا رجالة ، انا افكر و هذه مشكلة ، انا افكر في امور بسيطة و غالبا سيتم سن قانون بمنع التفكير قريبا و ربما تسمعوا عني في الاخبار (القبض على عميل خائن بتهمة التفكير)
لذا متفكروش ، لانه الغباء و البلاهة و التفاهة اصبحت هي القيمة ، و اذا قبض علي فقولوا عني اني مكونتش عايز افكر بس كنت مريض بفيروس المخ و التهاب العقل و اني حاولت بس مقدرتش
و في الاخر انا عندي واوا عايز حد يبوسهالي
No comments:
Post a Comment